ಮಂಗಳೂರು, ಅ. 29 : ದಾಯ್ಜಿವರ್ಲ್ಡ್ ಮೀಡಿಯಾ ಹಾಗೂ ಮಂಗಳೂರು ಇನ್ಸ್ಟಿಟ್ಯೂಟ್ ಆಫ್ ಓಂಕಾಲಜಿ (MIO) ಸಹಯೋಗದಲ್ಲಿ ‘ಕ್ಯಾನ್ಸರ್ ಗೆಲ್ಲೋಣ’ ಎಂಬ ಒಂದು ವರ್ಷದ ಕ್ಯಾನ್ಸರ್ ಜಾಗೃತಿ ಅಭಿಯಾನವನ್ನು ಶನಿವಾರ ಆರಂಭಿಸಿದೆ. ಈ ಉಪಕ್ರಮದ ಮೂಲಕ ಕ್ಯಾನ್ಸರ್ ತಡೆಗಟ್ಟುವಿಕೆ, ಚಿಕಿತ್ಸೆ ಮತ್ತು ಗುಣಮುಖತೆ ಕುರಿತು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲು ಉದ್ದೇಶಿಸಲಾಗಿದೆ.
ಉದ್ಘಾಟನಾ ಭಾಷಣದಲ್ಲಿ ಸಂಸದರಾದ ಕ್ಯಾಪ್ಟನ್ ಬ್ರಿಜೇಶ್ ಚೌಟ ಅವರು ಮಾತಾಡಿ, ಸಕಾರಾತ್ಮಕ ದೃಷ್ಟಿಕೋನದಿಂದ ಸಾಮಾಜಿಕ ಜಾಗೃತಿ ಸೃಷ್ಟಿಸಲು ದಾಯ್ಜಿವರ್ಲ್ಡ್ ಮತ್ತು ಎಂಐಒ ಸಹಯೋಗದಲ್ಲಿ ಕ್ಯಾನ್ಸರ್ ಜಾಗೃತಿ ಅಭಿಯಾನ ಆರಂಭಿಸಿದೆ.ಈ ಜನಹಿತೈಷಿ ಉಪಕ್ರಮ ಸಮಾಜದ ಆರೋಗ್ಯ ಕ್ಷೇತ್ರದಲ್ಲಿ ಮಹತ್ವಪೂರ್ಣ ಬದಲಾವಣೆ ತರಲಿದೆ ಎಂದು ಹೇಳಿದರು.
ವಾಲ್ಟರ್ ನಂದಳಿಕೆ ಅವರು ಮಾತಾಡಿ, ಮಾಜಿ ಸೇನಾ ಕ್ಯಾಪ್ಟನ್ ಮತ್ತು ಎಂಐಒವಿನ ನಿಷ್ಠಾವಂತ ವೈದ್ಯರೊಂದಿಗೆ ಇರುವುದು ಗೌರವದ ವಿಷಯ. ಸೇನೆಯು ನಮ್ಮ ರಾಷ್ಟ್ರವನ್ನು ರಕ್ಷಿಸುತ್ತದೆ ಮತ್ತು ವೈದ್ಯರು ಜೀವನವನ್ನು ರಕ್ಷಿಸುತ್ತಾರೆ. ನಾವು ‘ಕ್ಯಾನ್ಸರ್ ಗೆಲ್ಲೋಣ’ ಅನ್ನುವ ಅಭಿಯಾನವನ್ನು ಆರಂಭಿಸುತ್ತಿದ್ದೇವೆ.ಇದು ತಡೆಗಟ್ಟುವ ತಂತ್ರಗಳು, ಚಿಕಿತ್ಸೆಯ ಮಾಹಿತಿ, ಉಳಿದವರ ಕಥೆಗಳು ಮತ್ತು ಆಶೆಯ ಸಂದೇಶಗಳನ್ನು ಒಳಗೊಂಡ ಒಂದು ವರ್ಷದ ಜಾಗೃತಿ ಚಳುವಳಿ ಎಂದರು.
ಕ್ಯಾನ್ಸರ್ ಒಬ್ಬ ವ್ಯಕ್ತಿಯ ಮೇಲೆ ಮಾತ್ರವಲ್ಲ, ಸಂಪೂರ್ಣ ಕುಟುಂಬವನ್ನು ಭಾವನಾತ್ಮಕವಾಗಿ ಪೀಡಿಸುತ್ತದೆ. ಕ್ಯಾನ್ಸರ್ ಎಂದರೆ ಮರಣ ಎಂಬ ಮಿಥ್ಯೆಯನ್ನು ನಾವು ಮುರಿಯಬೇಕು. ಸಕಾರಾತ್ಮಕತೆ, ವೈದ್ಯಕೀಯ ಬೆಂಬಲ ಮತ್ತು ಕುಟುಂಬದ ಬಲದಿಂದ, ಗುಣಮುಖತೆ ಸಾಧ್ಯ. ನಾವು ಆರ್ಥಿಕ ಸಹಾಯವನ್ನು ಬೇಡುತ್ತಿಲ್ಲ – ಕ್ಯಾನ್ಸರ್ ಅನ್ನು ಜಯಿಸಬಹುದು ಎಂಬ ಸಂದೇಶವನ್ನು ಹರಡಲು ನಿಮ್ಮ ಬೆಂಬಲ ಮಾತ್ರ ಬೇಕು ಎಂದರು.
MIO ಇದರ ವಿಕಿರಣ ಓಂಕಾಲಜಿ ವಿಭಾಗದ ನಿರ್ದೇಶಕ ಡಾ. ಸುರೇಶ್ ರಾವ್ ಅವರು ಮಾತಾಡಿ, ಕ್ಯಾನ್ಸರ್ ಬಗ್ಗೆ ಭಯವೇ ಅನೇಕ ವೇಳೆ ದೊಡ್ಡ ಸಮಸ್ಯೆ. ಮುಂಚಿನ ಪತ್ತೆ ಮತ್ತು ಸರಿಯಾದ ಚಿಕಿತ್ಸೆಯಿಂದ ಕ್ಯಾನ್ಸರ್ ಸಂಪೂರ್ಣವಾಗಿ ಗುಣಮುಖವಾಗುವಂಥ ರೋಗವಾಗಿದೆ. ರೋಗದ ಆರಂಭಿಕ ಹಂತದಲ್ಲೇ ಚಿಕಿತ್ಸೆ ಆರಂಭಿಸಿದರೆ ಗುಣವಾಗುವ ಸಾಧ್ಯತೆ ಹೆಚ್ಚು. ಭಯದ ಅಂತ್ಯವೇ ಗುಣಪಡಿಸುವಿಕೆಯ ಆರಂಭ ಎಂದು ಒತ್ತಿಹೇಳಿದರು.
ಸಮಾರಂಭದಲ್ಲಿ MIO ಇದರ ಮುಖ್ಯ ಸರ್ಜಿಕಲ್ ಓಂಕಾಲಜಿಸ್ಟ್ ಡಾ. ಜಲಾಲುದ್ದೀನ್ ಅಕ್ಬರ್ ಮತ್ತು ಸರ್ಜಿಕಲ್ ಓಂಕಾಲಜಿಸ್ಟ್ ಡಾ. ರೋಹನ್ಚಂದ್ರ ಗಟ್ಟಿ ಸೇರಿದಂತೆ ಆರೋಗ್ಯ ರಂಗದ ಪ್ರಮುಖರು, ವೈದ್ಯಕೀಯ ವಿದ್ಯಾರ್ಥಿಗಳು, ಆಸ್ಪತ್ರೆ ಸಿಬ್ಬಂದಿಗಳು ಮತ್ತಿತರರು ಉಪಸ್ಥಿತರಿದ್ದರು.
